Шефот на „Порше“, Матијас Милер, изјави дека негова цел е овој производител во својата гама да има седум модели.
-Со оглед на фактот дека во денашно време животниот циклус на една генерација автомобили изнесува околу седум години, идеално би било да имаме и толкав број модели, рече Милер во разговор за „Auto Motor und Sport“.
-Тоа ќе ни овозможи секоја година да претставуваме нова генерација на еден од овие седум модели, ја објаснува Милер својата идеја.
Според него, шестиот модел во актуелната гама може да биде спортски автомобил што ќе биде позициониран меѓу „Порше 911“ и „Порше 918 Спајдер“, додека место за седмиот модел се чува за помалата верзија на „Панамера“, чиј работен назив е „Панамера Јуниор“.
Кога станува збор за новиот суперавтомобил, Милер соопшти дека „Порше“ нема да брза со неговата реализација, туку внимателно ќе го завршува новиот проект. Тој потврди дека Плуг-ин Хибрид технологијата ќе игра значајна улога во иднината на компанијата.
Новиот, таканаречен Е-Хибрид прво ќе се појави во „Панамера“, за подоцна да биде применет и на два СУВ модели- „Кајен“ и „Макан“.