Јагуар Ленд Ровер објави планови за изградба на нова фабрика во Словачка до 2018 година, што треба да придонесе за остварување на амбициозната цел за годишно производство на компанијата од еден милион возила, а првиот модел што ќе излезе од новата фабрика е најновата генерација на Ленд Ровер Дифендер.
Новата фабрика моменталното производство на Јагуар Ленд Ровер ќе треба да го зголеми за дополнителни 300.000 возила.
Освен во Велика Британија, компанијата има фабрики во Австрија, Бразил и Кина, а новата фабрика во Словачка има за цел остварување на амбициозниот план за производство на милион единици на годишно ниво, што е еден од основните услови на британската компанија со цел посериозна конкуренција на германските гиганти како БМВ, Ауди и Мерцедес.
– Глобалното ширење на нашето работење е клучно за долгорочен раст на компанијата. Освен нови капацитети, ни овозможува и инвестирање во развој на нови возила и технологија, како и создавање нови работни места во Велика Британија, изјави извршниот директор на Јагуар Ленд Ровер Ралф Спет за време на најавата на изградбата на новата фабрика.