Голем скандал го потресе светскиот тенис – Ник Кирјос е суспендиран откако беше позитивен на кокаин.
Австралиецот (31) даде примерок на 22 јуни за време на турнирот АТП 250 во Љорет де Мар/Мајорка во Шпанија. Лабораторија акредитирана од Светската антидопинг агенција го потврди присуството на бензоилекгонин, метаболит на кокаинот, на 17 јули.
Кирјос подоцна се огласи на социјалните мрежи за да им се извини на своето семејство, навивачите и спонзорите.
„Им се извинувам на моите навивачи, моето семејство, моите спонзори и на сите блиски до мене. Прво и основно, им се извинувам на децата што ме следат. Знам каков пример поставува ова и длабоко сум разочаран од себе.“
Австралиецот одигра само четири натпревари во поединечна конкуренција оваа сезона, додека во претходните години постојано се мачеше со повреди. Неговиот последен настап беше на Вимблдон, каде што беше поразен во првото коло во двојки заедно со Александар Бублик.
Кирјос постигна еден од најголемите успеси во својата кариера на Лондонскиот гренд слем, кога стигна до финалето во поединечна конкуренција во 2022 година.
Во долга порака, Австралијанецот зборуваше и за тешкиот период низ кој минува, но нагласи дека не бара оправдување за она што се случи.
„Немам намера да барам изговори, но сакам да дадам малку контекст за тоа низ што поминувам“, продолжи Кирјос во својата објава на социјалните мрежи и рече:
„Повредите во изминатите неколку години зедоа огромен данок, и физички и ментално. Моето тело не беше во можност да го направи она што мојот ум го очекува од него, а справувањето со фактот дека се ближам кон крајот на мојата кариера беше потешко отколку што можев да замислам. Секогаш велев дека јас не го избрав тенисот – тенисот ме избра мене. Но, напуштањето на нешто што беше целиот мој живот е едно од најтешките нешта со кои некогаш сум морал да се справувам. Имаше моменти кога се чувствував беспомошен и осамен. Ништо од тоа не го оправдува она што го направив. Сепак, добрата вест е дека ова ми послужи како повик за будење. Во следните 28 дена ќе правам пауза од социјалните медиуми и јавниот живот додека се фокусирам на враќање на вистинскиот пат. Би ги замолил луѓето да ја почитуваат мојата приватност во овој период, а најважно од сè, приватноста на моето семејство. Жал ми е. Ќе направам што треба и ќе се вратам подобар.“
Сега го чека период на неизвесност Киргиос. До конечната одлука на трибуналот, тој нема да може да игра, да тренира, ниту да присуствува на настани организирани од машките и женските тениски турнеи.