Металург се пласираше во финалето на Купот на Македонија, откако го совлада Еурофарм Работник со 21: 28 во вториот полуфинален натпревар на завршниот турнир, кој се игра во салата „Младост“ во Битола.
Гостите од Скопје уште во седмата минута имаа водство од 3:6 и без поголеми проблеми ја одржуваа предноста. Металург на паузата замина со предност од 11:15.
Иако Еурофарм Работник во неколку наврати се обидуваше да се врати во игра, при што во почетокот на второто полувреме дури намали на два поени разлика (14:16), сепак остана без сила за целосен резултатски пресврт.
Металург направи серија со пет голови и во 42 минута ја зголемија предноста на 14:20. Гостите потоа воспоставија контрола над теренот и натпреварот го завршија со резултат од 21: 28.
Металург во финалето на Купот на Македонија ќе се соочи со бранителот на титулата Вардар, кој претходно го совлада Пелистер. Финалето се игра утре со почеток во 16:30 часот во Битола.