Компанијата „Мекларен“ сака своите автомобили да им ги понуди на малку поширока публика, па зад параванот веќе го подготвува „влезниот модел“ под кодно име „П13“.
За „Мекларен“, сепак, овој „влезен модел“ претставува двосед од карбонски влакна, со В8 агрегат од 3,8 литри и 450 коњски сили чија конкуренција се „Ауди Р8“, „Нисан ГТ-Р“, „Порше 911 Карера С“.
Британскиот производител на суперавтомобили треба да исфрли три верзии на моделот „П13“ со различни каросерии – регуларен купе, кабриолет и ГТ верзија, која ќе нуди поголем багажен простор и која на прва топка ќе делува најпримамливо за најшироката публика.
Се очекува производство на околу 4.000 парчиња годишно.
Пресвртот во делувањето помалку е неочекуван за „Мекларен“, чии машини досега ги возеа само ретките среќници, но се верува дека по успехот со моделот „650 с“ публиката добро ќе реагира и на релативно пристапниот, а луксузен и моќен „ГТ“ автомобил што ја носи ознаката „Мade in Britain“.
Информациите ги објави магазинот „Car&Driver“, што наведува дека „П13“ со цената ќе биде во рангот на врвно опремениот „ Порше 911“ и ќе изнесува околу 120.000 евра. Други извори наведуваат дека цената ќе биде малку повисока.
Моделот треба наводно да се појави во јавноста кон крајот на 2015 година.