И покрај планот до 2018 година пет пати да ја зголеми продажбата во однос на бројот на испорачани автомобили во 2013 година, „Масерати“ не планира да произведува помали возила од моделот „Гибли“.
Освен тоа, од компанијата пристигнуваат вести дека во понудата нема да се најде поевтин модел на „Масерати“ од СУВ моделот „Леванте“, најавен за 2015 година.
Иако нема намера да произведува поевтини автомобили од овие два модела, италијанскиот производител не ја отфрла можноста за намалување на цените на некои од постоечките модели, што секако ќе придонесе за раст на продажбата и достигнување на посакуваната цел до 2018 година.
Како што пренесува авто-магазинот „Моторинг“, „Масерати“ ќе мора да се трансформира од производител на „егзотични“ автомобили во компанија што изработува „ексклузивни“ возила, за да ја зголеми продажбата од 15.700 единици, колку што пласираше во 2013 година, на планираните 75.000 примероци.
Се верува дека СУВ-от „Леванте“ значително ќе придонесе за раст на продажбата и дека тоа ќе биде новиот најпродаван модел во гамата на „Масерати“.