Иако сега веќе е речиси извесно дека на патиштата нема да го видиме „Абарт 500Л“, сништата за екстремната верзија на „ФИАТ-от од Крагуевац“ и натаму постојат.
Откако беше претставен „ФИАТ 500Л“ се шпекулира за производството на спортската, Абарт варијанта на овој модел. На почетокот пристигнуваа позитивни сигнали дека такво нешто може да се случи, а приказната во 2013 година ја подгреа и шефот на Абарт за Европа, Марко Мањанини. Тој тогаш изјави дека „постојат големи шанси“ знакот на шкорпионот да се најде на маската од ладилникот на „ФИАТ 500Л“.
Во меѓувреме, кај италијанскиот производител беа зафатени со многу поважни теми и работи, како што е формирањето на компанијата „ ФИАТ Крајслер Автомобили“, а плановите за производство на „Абарт 500Л“, ако навистина и постоеле, останаа заборавени во некоја фиока.
Сепак, одделни вљубеници во автомобилите кои сакаат на улиците да го видат овој модел не се откажаа. Деновиве се појави шпекулативен рендер што покажува како може да изгледа Абарт верзијата на „ФИАТ 500Л“ кога би дошло до нејзината реализација.