Иако главниот дизајнер на „Киа“ и еден од директорите во корејскиот производител на автомобили, Петер Шрајер, се залага за производство на спортски модел, во компанијата надвладува мислењето дека се уште e рано за еден таков автомобил.
Со оглед на фактот дека во последните неколку години „Киа“ претстави концепти на спортски автомобили, како што се „ГТ“ и „ГТ4 Стингер“, се очекуваше овој производител многу брзо на купувачите да им понуди и продукциски спортски модел. Меѓутоа, се до сега тоа не се случи.
Директорот за маркетинг во „Киа“, Ли Сун-Нам, во разговор за „Аутомотив Њуз“ изјави дека оваа компанија мора да го подобри својот имиџ, пред да се впушти во производство на вистински спортски автомобил.
– Прво треба да го покренеме имиџот на „Киа“ на уште повисоко ниво. Тоа ќе придонесе идните модели да бидат значително подобро прифатени на пазарот, вели Ли Сун-Нам.
Тој објаснува дека постојат два проблема со кои „Киа“ се соочува кога станува збор за евентуалниот спортски модел. Првиот е што првите луѓе во компанијата не се убедени дека еден таков автомобил може да привлече доволен број купувачи за вложувањата во неговиот развој и производство да се исплатат. Втората причина е веќе споменатиот имиџ кој, според него, не е доволно силен за да поддржи спортски модел со амблемот на „Киа“.
– Доколку некој кинески производител на автомобили, на пример, на пазарот понуди роудстер, мислите ли дека ќе ги заинтересира купувачите? Не сум сосема убеден, заклучи Ли Сун-Нам.