Шампионот во СЕХА, Вардар вчера во дуелот со Веспрем на унгарскиот тим му го нанесоа првиот пораз сезонава во СЕХА лигата. Вардар победи со 28:21.
По дуелот тренерот на Вардар, Раул Гонзалез истакна дека е задоволен како играчите го одиграле натпреварот и од се што се случувало на теренот.
– Ние сме насочени кон Лигата на шампионите (сабота на гости со Висла). Добро е што сите играчи добија шанса да играат. Сега само ни останува да се подготвиме за дуелите со Висла, рече Гонзалез.
Тренерот на гостите, Карлос Перез Ортега честиташе за победата.
– Вардар играше многу подобро во текот на целиот натпревар. Ние имавме проблеми и во нападот и во одбраната, која не беше на ниво. Кога не сте на потребното ниво со еден добар противник се случува ова, изјави по дуелот Ортега.
Екипите на Веспрем и на Вардар како две првопласирани ќе бидат слободни во четвртфиналето од завршниот турнир, а ќе ги очекуваат ривалите во полуфиналето. Завршниот турнир ќе се одигра од 25 до 29 март во Веспрем.