Српскиот тениски ас Новак Ѓоковиќ е новиот шампион на турнирот во Рим. Најдобриот тенисер на светот стигна до петтата титула во „вечниот град“ по победата над Аргентинецот Диего Шварцман со 7:5, 6:3.
Србинот ја освои рекордната 36-та титула на Мастерс-турнирите и по тој показател е на првото место на вечната ранг-листа. Ѓоковиќ стигна и до вкупно 81 трофеј во кариерата.
Триумфот на Новак му донесе нови 400 АТП поени, со кои ја зголеми предноста пред второпласираниот Рафаел Надал. И сето тоа се случи на денот кога го престигна Пит Сампрас на второто место на вечната листа според бројот на недели поминати на првата позиција.
33-годишниот Ѓоковиќ стана најстариот шампион во историјата на Мастерсот во Рим.
Шварцман се бореше за првата титула на турнирите од серијата 1.000, но по фантастичните победи над Надал и Шаповалов, не можеше да го совлада првиот тенисер во светот.