Фудбалската федерација на Гана, од Меѓународната фудбалска федерација (ФИФА) побара решавачкиот плеј-оф натпревар за пласман на Светското првенство во Бразил 2014 година, против Египет да се игра на неутрален терен.
Ваквото барење федерацијата на Гана го базира на лошата безбедносна состојба во Каиро.
Во писмото упатено од ФИФА, Фудбалската федерација на Гана наведува дека натпреварот треба да се игра на „безбедно место“.
– Нашето барање е засновано на фактот за алармантно лошата безбедноста ситуација во Египет. Дел од нашите играчи се сериозно загрижени за својата безбедност за време на натпреварот, стои во писмото упатено до ФИФА, а објавено и на официјалната веб-страна на Фудбалската федерација на Гана.
Од ФИФА потврдија дека го добиле писмото и дека внимателно ќе го следат развојот на настаните во Египет.
Засега останува реванш натпреварот меѓу Египет и Гана да се игра на 19 ноември во Каиро, дуел по кој ќе биде познат и патникот на Светското првенство во Бразил 2014. Првиот натпревар овие две селекции ќе го играат на 15 октомври во Кумаши.