Јужнокорејската компанија „Хјундаи“ во Лос Анџелес на приватен настан го најави купе концептот Вижн Г, што официјално ќе биде претставен на претстојниот Пебл Бич настан.
Според Хјундаи автомобилот е инспирација за идното семејство премиум возила на компанијата.
– Сакавме да создадеме ДНК што го балансира дизајнот и перформансите со идејата да се избегнат стереотипните одлики на луксузните возила, изјави директорот за дизајн на Хјундаи и КИА Питер Шрејер за време на претставувањето на концептот.
Ова луксузно купе концепт претставува стилизиран Генесис купе со доминантна предна решетка чии линии се надополнети со закосени долгнавести предни светла.
Внатрешноста е луксузна и доминираат елементи од кожа, дрво и златни детали и акценти. Концептот е придвижуван од 5,0 литарски Тау В8 мотор со 420 коњски сили.