„Ауди“ на Саемот на автомобили во Пекинг го претстави „ТТ Офроуд“ концепт, кој е теренска изведба на најновиот ТТ спортски модел.
Концептот е базиран на неодамна претставената последна генерација на ТТ, но има четири врати, повисока суспензија и четири независни седишта.
Пред неколку недели Урлих Хакенберг најави дека „Ауди“ ќе ја искористи популарноста на ТТ брендот за лансирање на нови модели.
„ТТ Офроуд“ концептот е базиран на МКуБ платформа. Внатрешноста е целосно преземена од ТТ каде е впечатлива виртуелната инфо табла од 12,3 инчен дисплеј, на кој се сместени сите информации, од инфотејнмент системот до брзинометарот.
Погонскиот систем е „плаг-ин“ хибрид составен од 2,0 литарски ТСФИ мотор, два електрични мотори и шестстепен С-троник менувач со двојка спојка што силата ја пренесува на предната оска.
Вкупната сила изнесува 408 коњски сили, а според фабричките податоци потрошувачката изнесува неверојатни 2,3 литри на 100 километри.