Шендрит Деари со победа ги почна натпреварите на фјучрс турнирот во Пловдив, Бугарија. Македонскиот тенисер денеска со 2:1 (6-3; 3-6 и 6-3) во сетови го победи квалификантот од Бугарија Васил Младенов. Деари имаше еден брејк повеќе од противникот (3:2).
Во следното коло противник ќе му биде победникот од мечот Александар Лазов (Бугарија) и Матео Чивароло (Италија).
На фјучрсот во Пловдив во сингл ќе настапи и Стефан Мицов, кој откако ги мина квалификациите ќе игра против Тед Бачев (Бугарија). Мицов попладнево ќе настапи и во конкуренција на двојки со Пламен Милушев (Бугарија).
Меч во двојки попладнево на фјучрс во Белград ќе игра и Томислав Јотовски. Од нашите тенисери вчера првото коло на фјучрсот во Белгија успешно го мина Димитар Грабул откако го победи белгискиот тенисер Александер Фоле со 6:3 и 6:4 во сетови.
Во второто коло Грабул ќе игра против уште еден белгиски тенисер Ромен Божарс.