Доколку кај некого постоше и најмал сомнеж во комерцијалниот успех на обновениот „Мајбах“, чии модели сега се продаваат под значката на „Мерцедес“, кинескиот пазар е тука да го разувери. Во оваа земја месечно се продаваат околу 500 примероци „Мерцедес-Мајбах“ од „С класа“. чија почетна цена изнесува 230.000 долари.
Откако во февруари почна да ги продава моделите „Мајбах С500“ и „Мајбах С600“, „Мерцедес“ во просек во Кина секој месец испорачува 500 вакви автомобили.
Како споредба, стариот „Мајбах“ најдобрата продажба ја имаше во 2003 година кога кинеските купувачи во текот на целата година купија вкупно 600 возила.
Дури и ако се знае дека старите модели, како „Мајбах 52“, што чинеше од 350.000 долари па нагоре, беа поскапи и полуксузни од актуелниот „Мерцедес Мајбах“, моменталната продажба и натаму може да се оцени како исклучително добра.
„Мерцедес“ со враќањето во игра на марката „Мајбах“ сакаше да земе дел од колачот на производителите, како „Ролс-Ројс“ или „Бентли“.
Во однос на стандардната „С класа“, „Мајбах“ верзијата е полуксузна и има повеќе простор во кабината, особено за оние кои седат на задните седишта.
А тие „патници“ вообичаено се и сопственици на овие скапоцени автомобили – бидејќи „Мерцедес Мајбах“ е автомобил зад чиј управувач најчесто се наоѓа униформиран професионален возач.