Надворешни воздушни перничиња и систем за предупредување од несреќа се најнов начин за зашатита на патниците и пешаците при судар, пишува „Дејли Мејл“.
Системот составен од сензори поставени на покривот од возилото го следат сообраќајот и движењето на автомобилите и доколку дојде до опасност од судар, автоматски ги активира надворешните воздушни перничиња. Целиот процес трае меѓу 20 и 30 милисекунди.
Новиот безбедносен систем се уште е во фаза на тестирање, но од компанијата ТРВ Аутомотив, која работи на неговиот развој, тврдат дека тој ќе се најде во употреба во Германија до крајот на оваа декада.
Воздушните перничиња ќе се вградуваат на сите страни на возилото, а специјални ќе бидат поставени и во тркалата. Моментално се работи на тестирање на системот што ќе ги поврзува камерите и сензорите за надгледување на страните на возилото.
– Речиси 40 отсто од несреќите се случуваат при удар на едно возило во страничниот дел на друго и ние сакаме да ги намалиме последиците, изјави претседателот на компанијата Норберт Кагерер.
Тестираните надворешни перничиња се долги 200, високи 70 и широки околу 20 сантиметри.