Србија го третира Косово и ќе продолжи да го третира како свој составен дел, изјави денеска во Тирана премиерот на Србија Александар Вучиќ, јави Танјуг.
– Факт е дека не се согласуваме околу Косово и Метохија. Србија ќе го третира и ќе продолжи да го третира како составен дел, додека Албанија го третира Косово како независна држава, наведе Вучиќ.
Тој, на заедничка прес-конференција со албанскиот премиер Еди Рама во Тирана, истакна дека Србија и Албанија, без оглед на различните ставови кон Косово, не треба да ги заоструваат меѓусебните односи, туку треба да ги почитуваат разликите и да изнајдат заеднички јазик.
Српскиот премиер посочи дека двата народи се соседи и така ќе останат, па затоа сите проблеми треба да ги решаваат со дијалог.
– Односот на Србија и Албанија е важен за Балканот. Односите секогаш можат да бидат подобри, потенцира Вучиќ.