Србинка од Косовска Митровица и нејзиниот долгогодишен партнер, Ј.И., припадник на хрватските воздухопловни сили, пилот на воен хеликоптер, беа уапсени на Вис под обвинение за шпионажа во корист на Србија.
Според многу ограничените информации, цивилната и воената полиција ги истражуваат, но во истрагата е вклучен и Европол.
Неофицијално, хрватски „Индекс“ пренесува дека денес двајцата осомничени биле испрашувани и дека се чека одлука дали ќе завршат во притвор.
Според неофицијални информации, истражителите се сомневаат дека хрватскиот воен пилот, кој бил ангажиран во КФОР (меѓународните мировни сили на НАТО во Косово), ѝ дал на својата партнерка доверливи информации што таа им ги пренела на членовите на Српската листа, партијата на српското малцинство во Косово.
Се сомнева дека Ј.А. ѝ дал на својата девојка информации за движењата на Србите на северот на Косово од крајот на 2022 година до оваа година, како и за движењата на трупите на КФОР.
Меѓу другото, истражителите тврдат дека тој ѝ открил корисни информации поврзани со Зубин Поток, место на северот на Косово каде што често се појавуваат проблеми меѓу Србите и жителите на Косово.
Имено, станува збор за политички и безбедносно најчувствителниот дел од Косово, бидејќи Белград и Приштина го сметаат за клучен за контрола и интеграција на северот.
Семејството и пријателите на уапсениот пар се во шок, особено затоа што А.М. неколкупати била во Хрватска. Во Србија работела за странска компанија, а во новинарските кругови е позната како новинарка од Косовска Митровица. По професија е социолог.
Нејзиниот партнер, со кого неколкупати раскинала и ја обновила врската, е активен член на хрватската армија.
Според јавно достапните податоци, тој најчесто бил вработен како пилот на воен хеликоптер.
Тој учествувал и во спасувачки операции во кои биле вклучени хрватските воздухопловни сили, како и во мировни мисии – во Косово и Авганистан.