Откако Градот Загреб неодамна понуди бесплатни антигенски тестови за коронавирусот, денеска властите во хрватскиот главен град отидоа чекор понапред и започнаа со спроведување тестови на учениците во основни и средни училишта, за да се утврди колку вирусот е присутен кај таа популација.
Во прашање е пилот-истражување во чии рамки ќе бидат тестирани и вработените во училиштата, велат здравствените власти.
„Ќе се спроведе тестирање во 15 одбрани училишта, осум основни и седум средни, а планирано е вкупно да се тестираат 180 ученици од различни класови, за да се добие различна возрасна структура, секако со претходна писмена согласност од родителите. Ќе бидат тестирани и 20 вработени кои работат со децата,“ изјави Ива Милардовиќ Штимац од Одделот за образование на Загреб.