Цела ноќ траеше потрагата и спасувањето на две планинарки од САД, кои вчера се изгубија на Шар Планина во областа на Ливадичкото Езеро. Спасувачката акција беше успешно завршена во утринските часови, иако теренот беше непристапен, а лошите временски услови значително го отежнаа пребарувањето.
Вкупно 12 спасувачи од Косовската планинска служба за спасување (SHKSHMK) учествуваа во оваа тешка операција. Покрај нив, во потрагата се придружија и припадници на Полициската станица Штрпце, припадници на Косовските сили, како и противпожарната служба на Штрпце. Голема помош пружија членовите на Радио Борзанија, кои активно учествуваа во пребарувањето на теренот во текот на целата ноќ.