Едно лице е рането со огнено оружје во тежок инцидент кога биле нападнати и претепани полицајци, денеска во Косово Поље (Фуш Косова), во близина на Приштина.
Како што известуваат локалните медиуми, околу 14 часот биле нападнати двајца полицајци на улицата „Пеќка“ во градот, по што било испратено засилување. Едно лице се здобило со повреди од огнено оружје, додека во физичка пресметка, пет лица се повредени, од кои двајца се полицајци,” се вели во соопштението на косовската полиција.
Медиумите објавија и аматерски снимки од инцидентот, на кој се гледа како неколкумина луѓе буквално ги шутираат полицајците.
Двајца осомничени се приведени во врска со инцидентот, а полицијата работи за да го расветли случајот.