13-годишник од Новалја исчезнал синоќа околу 22 часот од шеталиште близу центарот во Херцег Нови, кај хотелот „Плажа“, кога бран го одвлекол во морето. Според последните информации, детето било влечено од морската струја додека се обидувало да се фотографира.
Потрагата се уште трае и засега нема информации за момчето.
Жарко Лукшиќ, раководител на секторот за потрага и спасување на море во Дирекцијата за поморска безбедност и управување со пристаништа на Црна Гора, изјави дека во моментот на исчезнувањето на момчето брановите биле доста големи, а ветерот дувал со брзина од 100 километри на час.
„Бранот го повлече момчето од таа патека во морето и тој исчезна. Пребаруваме со специјален скутер за спасување. Во моментов условите се тешки, има силни морски струи и бранови“, изјави Лукшиќ.
По момчето трагаат службеници од МВР, Управата на полицијата, противпожарната служба и нуркачи од Бијела.
„Синоќа пребаруваа со батериски ламби, но тоа е невозможна мисија поради временските услови“, истакнува Лукшиќ.