Властите во Србија уапсиле 43-годишен државјанин на Северна Македонија, осомничен дека им понудил поткуп на сообраќајни полицајци за да избегне казна за сообраќајни прекршоци.
Според српското Министерство за внатрешни работи, осомничениот З. А. бил уапсен од припадници на МВР, Управата за криминалистичка полиција и Службата за борба против корупцијата, по налог на Посебното одделение за сузбивање корупција при Вишото јавно обвинителство во Краљево.
Тој управувал автомобил на автопат во близина на Краљево, при што ја надминал дозволената брзина и се движел по левата сообраќајна лента, иако десната била слободна.
Кога бил запрен од сообраќајната полиција, на полицајците им понудил пари за да не му издадат прекршочен налог за направените сообраќајни прекршоци.
Против него е поднесена кривична пријава за давање поткуп, а му е одредено задржување до 48 часа. По истекот на задржувањето, тој ќе биде приведен пред надлежното обвинителство.