Владата на Република Србија на денешната седница усвои дополнување на одлуката за привремена забрана за извоз на основни земјоделски и прехранбени производи значајни за населението, со која од забраната за извоз се изземени прехранбените производи од органско потекло, јави дописникот на МИА од Белград.
– Имајќи ги предвид малите површини каде во Република Србија се одвива органско производство – сектор кој сè уште се развива во Србија, како и фактот што овие производи првенствено се наменети за извоз, се проценува дека ослободувањето од постојната забрана не го загрозува домашниот пазар и прехранбената безбедност на населението, се наведува во соопштението на Канцеларијата за соработка со медиумите на српската Влада.
Прехранбени производи од органско потекло се оние кои се произведуваат на органски, природен начин, поточно без употреба на вештачки средства во производниот процес – пестициди, хербициди, вештачки минерални ѓубрива и разни хемикалии и без употреба на ГМО (генетски модифицирани организми).
Извор: МИА