Синодот на Српската православна црква (СПЦ) денеска оцени дека бриселскиот договор за Косово е „предавство на сопствената вековна и најважна територија“ и посредно и премолчено, но сепак фактичко признавање на косовската власт и повлекување на Србија од јужната покриана.
Синодот во соопштението потпишано од патријархот Иринеј наведува дека текстот на договорот потпишан во Брисел „за принципите за нормализација меѓу Белград и Приштина“ е еуфемизам наместо „Србија и Косово“.
– По плаќањето на ваква висока цена за фамозниот „датум за почеток на преговорите“ и тоа преговори со непознат број нови услови и со неизвесен исход, цената за евентуалниот влез во ЕУ ќе биде и формално признавање на „независно Косово“ од страна на Србија и нејзина обврска да не попречува Косово да добие место во ОН, се наведува во соопштението од Синодот на СПЦ.
Синодот апелира до пратениците во Собранието на Србија и до претседателот на Србија Томислав Николиќ „пред бог, историјата на српскиот род и сопствената совест да ја измерат својата морална и историска одговорност при одлучувањето за давање или недавање на согласност на Србија на таков текст од бриселскиот договор“.