Директорот на Општата болница во Сремска Митровица, Воислав Мирниќ, изјави дека седум патници кои беа најтешко повредени во автобуската несреќа во петокот се наоѓаат на интензивна нега во установата и дека нивната состојба засега е стабилна.
Тој, исто така изјави дека вчера имало 22 отпуштања на полесно повредените патници.
Според него, преостанатите пациенти се на одделенијата за ортопедија и хирургија и ќе бидат отпуштени во наредните денови, а нивната состојба се следи и се врши дополнителна дијагностика.
„Ќе имаме интервенции во врска со ортопедските повреди, ќе има операција, но состојбата на сите е стабилна“, рече Мирниќ.
Пациентот кој беше транспортиран во Белград, кој беше тешко повреден, засега е во стабилна состојба, додаде тој.
Во врска со вчерашната акција за собирање крв, Мирниќ наведува дека има доволно крв, но дека сигурно ќе биде потребна во наредниот период.
„Вчера се регистрираа и донираа крв повеќе од 90 дарители, а кампањата продолжува во Службата за трансфузија на крв на Општата болница во Сремска Митровица во вторник“, рече Мирниќ.
Тој вчера изјави дека 39 пациенти се хоспитализирани и дека седум се уште се на интензивна нега.
Утре, 20 октомври во Сремска Митровица ќе биде Ден на жалост поради несреќата во близина на градот во која загинаа три лица кога се преврте автобус, изјави градоначалникот Бранислав Недимовиќ.
Автобус што превезуваше работници од компанијата „Здравствена заштита“ се преврте на патот Сремска Митровица – Јарак околу 14.45 часот во петокот и загинаа три лица, а околу 80 беа повредени.