Сериозен скандал ја потресе Полициската управа Пожешко-славонска во Хрватска, откако во јавноста се појавија информации дека неколку полициски службеници наводно во повеќе наврати имале сексуални односи со иста жена, и тоа за време на работното време и во службено полициско возило.
Според хрватските медиуми, случајот бил откриен сосема случајно, за време на истрага поврзана со пријава за семејно насилство. При полицискиот увид, бил одземен мобилниот телефон на сопругата на еден од инволвираните, а при неговото вештачење биле пронајдени експлицитни фотографии и видеа.
На снимките, како што се наведува, биле препознаени повеќе полициски службеници, а дел од материјалите наводно биле направени во службено полициско возило и за време на нивната работна смена.
По објавувањето на информациите, надлежните институции започнале внатрешна истрага за да се утврди дали биле прекршени службените должности, како и дали постојат елементи за дисциплинска или кривична одговорност. Засега не се соопштени официјални детали за евентуални санкции, а истрагата е во тек.
Случајот предизвика бројни реакции во хрватската јавност, особено поради фактот што станува збор за лица задолжени за спроведување на законот. Јавноста очекува целосно расчистување на случајот и утврдување на одговорност доколку наводите се покажат како точни.