Јавното обвинителство на Босна и Херцеговина денеска го приведе и сослуша Винко Дриновац, шеф на Кабинетот на претседателот на Федерацијата БиХ, Живко Будимир.
Весникот „Глас Српске“ наведува дека Дриновац е уапсен во рамките на истрагата на аферата за примање поткуп за помилување на осуденици, во која се води истрага против Будимир и неговите соработници.
Сараевскиот весник „Дневни аваз“ пак објави дека Дриновац е приведен изутринава од Обвинителството на БиХ и по неколкучасовно сослушување е пуштен на слобода.
Дриновац потврдил дека бил сослушан од Обвинителството на БиХ, но без да објави повеќе детали за тоа. – Не сум уапсен. Гледате дека немам лисици на рацете, кратко одговори Дриновац.
Будимир беше уапсен кон крајот на април, а по едномесечен притвор ослободен врз основа на мислењето на Уставниот суд на неговата жалба.
Обвинителството на БиХ поднесе жалба на одлуката на Судот со која е одбиено барањето за продлжување на притворот и соопшти дека продолжува со истрагата.