Генерал-потполковник Дорин Јоница, поранешен командант на Командата на здружените сили на романската армија, е пронајден мртов во својата куќа во местото Паулешти, во округот Прахова.
Мажот (61) бил пронајден со прострелна рана во главата, а покрај неговото тело бил пронајден пиштол што легално го поседувал, пренесува романскиот весник „Либертатеа“.
Неговата сопруга ги известила надлежните откако, како што се наведува, во текот на ноќта ја напуштил куќата и престанал да одговара на телефонските повици. Екипи на итната медицинска помош и полицијата пристигнале на местото и можеле само да констатираат смрт.
„Во текот на ноќта, околу 1:24 часот, полицијата била известена од жена на околу 60 години, која пријавила дека нејзиниот сопруг, за кого е познато дека легално поседува оружје, ја напуштил куќата со пиштол кај себе. Полицијата веднаш презела мерки за да го пронајде и лоцира, како и да спречи каква било опасност за него или за други лица“, соопштиле претставници на Полициската управа на округот Илфов.
Генералот Дорин Јоница имал две куќи, едната во Илфов, а другата во местото Паулешти, во округот Прахова. Според извори на „Либертатеа“, неговото тело го пронашол зетот, односно сопругот на неговата сестра.
Генералот Јоница бил евидентиран во Националниот регистар на оружје како сопственик на пиштол „глок“. Засега нема индиции дека станува збор за убиство, а истражителите треба да ги утврдат околностите и точното време на неговата смрт.
„Во текот на утрото, Полициската управа на округот Илфов била известена дека 61-годишен маж бил пронајден мртов од роднина, во објект кој се наоѓа на територијата на една општина во округот Прахова. Полициските службеници, под надзор на надлежното обвинителство, спроведуваат истрага со цел прецизно да се утврдат сите околности под кои се случил настанот“, се наведува во соопштението на Полициската управа на Илфов.
Дорин Јоница бил еден од познатите офицери на романската армија. Учествувал во меѓународни мисии и извршувал функции во важни структури на романските вооружени сили.
Истрагата е во тек, а надлежните треба да ги утврдат сите околности за смртта на генералот Јоница, вклучително и дали станува збор за намерен или несреќен чин.