Младите во Босна и Херцеговина во најголем дел планираат живот надвор од земјата во која живеат, покажува истражувањето на Институтот за развој на младите КУЛТ.
Според истражувањето, повеќе од 70 отсто од младите планираат да ја напуштат Босна и Херцеговина по завршувањето на школувањето, додека повеќе од половина од нив немаат доверба во политичарите.
Посебен проблем, како што наведуваат во КУЛТ, е недоволното вклучување на младите во работата на политичките партии. Според податоците на Централната изборна комисија (ЦИК), младите сочинуваат меѓу 12 и 15 отсто од вкупниот број кандидати на изборните листи.
„Многу малку ги вклучуваат во суштинските подготвителни фази за изборните циклуси или за стратешките платформи, на пример, политичките платформи“, наведуваат од здружението за БХРТ.
Младите со кои е разговарано како причини ги наведуваат недовербата во политичарите, лошите услови за живот и недостигот од перспектива.
Во Студентскиот парламент на Универзитетот во Бања Лука сметаат дека на младите треба да им се овозможи решавање на станбеното прашање и вработување за да останат во земјата.
Претседателката на Здружението на граѓани „Оштра нула“, Милица Пралица, вели дека младите се апатични бидејќи се разочарани од политичкиот систем.
„Тие како млади луѓе не гледаат доволно можности, како да не им се дадени можности. А ако им се даде можност, се очекува од нив да продолжат да ги спроведуваат политиките на старите колеги“, наведе таа.