Хрватскиот премиер Андреј Пленковиќ денеска, на кратка средба во Брдо кај Крањ, на српскиот претседател Александар Вучиќ му кажал дека треба да се реши прашањето за учебникот во кој се негира постоењето на хрватскиот јазик.
Хрватскиот премиер се сретна со Вучиќ на маргините на самитот ЕУ-Западен Балкан.
-Му кажав да го реши прашањето за учебниците што практично го негираат постоењето на хрватскиот јазик, рече Пленковиќ подоцна за хрватските медиуми.
Хрватскиот премиер изјави дека тоа „треба да се поправи“ и додаде дека Вучиќ му возвратил „дека ќе види што може да направи од таа страна“.
Учебникот по граматика на групата автори „Од зборови на дела“ за учениците од осмо одделение во Србија наведува дека српскиот, словенечкиот, македонскиот и бугарскиот јазик припаѓаат на групата јужнословенски јазици и дека „Хрватите, Бошњаците и некои Црногорци српскиот јазик го нарекуваат хрватски, босански, бошњачки и црногорски “.
Ден пред средбата со Вучиќ, Пленковиќ кажа дека „негирањето на хрватскиот јазик во учебникот на Република Србија е срамно и недозволиво“.