Хрватскиот морнар Марко Бекавац е ослободен од турски затвор и е во Хрватска, ќе биде со своето семејство во текот на денот, потврди хрватскиот министер за правда, администрација и дигитална трансформација – Дамир Хабијан.
– Можам да потврдам дека капетанот Бекавац дојде во Хрватска утрово – рече Хабијан и изрази задоволство од неговото ослободување од затвор бидејќи, додаде, тоа е резултат на месеци напори во тој исклучително предизвикувачки случај.
Хрватскиот морнар Бекавац беше уапсен во октомври 2023 година во Турција и обвинет за шверц на 137 килограми кокаин, откако дрогата беше пронајдена на неговиот брод „Феничијан М“ во турското пристаниште Ерегли, а во септември минатата година беше осуден на 30 години затвор.
Враќањето на Бекавац, како што се наведува, се случи по координираните активности на Владата, Министерството за правда, дипломатијата и другите институции, а министерот Хабијан потсети и дека премиерот Андреј Пленковиќ и министерот за надворешни и европски работи Гордан Грлиќ Радман во неколку наврати разговарале за ова прашање со турските претставници, барајќи го најдоброто решение „за оваа предизвикувачка ситуација“.