Две жени од село Наталинци кај Топола, Србија ги преплавија социјалните мрежи со фотографии од куќи под вода и со тие слики се обидуваат да добијат пари од јавни личности.
Исто така и две млади лица од села кои што се наоѓаат во близина на Топола, собираат помош од луѓе, наводно за загрозени бебиња и од старите лица земаат по 1.000 динари.
Претседателот на општина Топола, Драган Јовановиќ преку својот профил на „Фејсбук“ ги предупреди сите добронамерни луѓе да внимаваат кому му даваат пари.
-Во село Наталинци, каде што овие жени бараат помош, ниту една куќа не е под вода. Сите бунари се чисти, а веќе три пати им е дадена помош. Тие две жени објавија слика од минатиот петок и со неа преку измама се обидуваат да добијат помош, пред се од пејачи, но и од други јавни личности – вели Јовановиќ.
Во апелот за помош во Наталинци, кој се појави на социјалните мрежи стои дека на некои семејства до сега никој не им помогнал.
На телефонскиот број кој е наведен се јавила жена, која признала дека надлежните од општината го исчистиле нејзиниот бунар и ја испумпале водата од подрумот.
-Донесете што можете. Ние сме петмина во куќата, ни треба вода за пиење, овие од општината ни донесоа малку. Доколку помошта ја оставите во општината, прашање е дали ќе ја добиеме- вели таа.
Додека останува отворено прашањето кој навистина е загрозен, а кој измамник Јовановиќ вели дека од понеделник на сајтот на општина Топола ќе бидат објавени списоци на сите донатори, но и на оние кои добиле помош.
Е. Г.