На секои пет минути во Ургентниот центар во Нови Сад пристигнуваат возила на итната помош, кои ги носат повредените во уривањето на настрешницата на железничката станица во тој град, јавува РТВ.
Како што се наведува, засега нема точни информации за бројот на повредени бидејќи теренот се уште се расчистува.
На терен се пристигнати и багери кои го расчистуваат теренот. Сообраќајот во тој дел од градот се одвива отежнато и е регулирано од полицијата.
Поради трагичниот настан на железничката станица и затворањето на тој дел од градот, сите автобуси на релации кои поаѓаат и завршуваат во Потковица, во наредниот период ќе сообраќаат од редовни постојки на поширок потег околу Потковица, информираат РТВ.
На железничката станица во Нови Сад денеска во 11:50 часот паднала бетонската настрешница на зградата на станицата и во оваа несреќа има повредени, соопштија претходно од Железничката инфраструктура на Србија.