Министерот за финансии и трансфери на Косово Бесник Бислими донесе одлука за ослободување од плаќање на данокот на додадена вредност на увозот на жито и брашно за производство на леб и лебни производи, јави дописникот на МИА од Приштина.
Информацијата е објавена преку владино соопштение до медиумите, во кое се наведува дека одлуката „има за цел спроведување на дополнителните мерки на Владата, усвоени по потврдувањето на последните случаи на заразени од вирусот Ковид-19“.
– Министерот за финансии и трансфери Бесник Бислими донесе одлука за времено ослободување од плаќањето на ДДВ на сиот увоз на жито и брашно за производство на леб и лебни продукти. Поаѓајќи од оваа одлука, по автоматизам и без потреба за поднесување посебни барања, се ослободуваат времено од царинската такса и ДДВ-то сите производни бизнис-субјекти или нивните контрактори кои се занимаваат со увоз на сировина. За спроведување на оваа одлука се задолжуваат Даночната управа на Косово и Царините на Косово, се вели во соопштението.