„Македонија не е добро дете“ заклучиле министрите за култура на Грција и Бугарија Костас Цаварас и Вежди Рашидов при нивната вчерашна средба во рамките на втората седница на Советот за соработка на високо ниво меѓу двете земји.
Електронското издание на „Прото Тема“ јави дека „двајцата министри разговарале за прогласувањето на 2013 година за година на Кирил и Методиј, при што Рашидов на Цаварас му го изразил своето незадоволство“ од Македонија.
– Ние ја почитуваме автономијата на другата земја но ако Македонија не стане добро дете нема да ги поддржиме. Денес тие викаат дека Кирил и Методиј се нивни, утре можат да кажат нешто друго, ја цитира весникот изјавата на бугарскиот министер.
Цаварас му честитал на Рашидов „за неговиот јасен став за прашањето, истакнувајќи дека заштитата на културното наследство не е ништо друго освен обид да се зачува историјата без фалсификати и измами поради националистичка и популистичка себичност“, пишува „Прото Тема“.
– Никој нема право да ја извртува историјата без последици, рекол Цаварас и додал дека „секој за себе може да тврди што сака, но историската вистина е конечниот суд за тоа кој е некој, од каде доаѓа и што претставува“.