Поранешниот хрватски претседател Стипе Месиќ се извини денеска „доколку некого навредил“ со изјавата за Јасеновац, со која ги негира злосторствата во тој логор, а своите зборови ги објасни под влијание на политичкиот амбиент од 1992 година, тогашните воени околности и влијанието на неточните информации.
Месиќ во соопштението објаснува дека „снимката е направена во Новска за време на неформален разговор во воената 1992 година додека ја вршел должноста претседател на Извршниот одбор на ХДЗ“.
Тој истакна и дека таа изјава „нема да ги намали неговите ставови, кои се познати во јавноста, и мислењето за антифашизмот“.
– Наведеното случување секако не е и нема да ги намали моите ставови и мислења за антифашизмот кои им се одлично познати на јавноста, а ако некого навредив со таа изјава тогаш се извинувам – порача Месиќ.
На Јутјуб утрово се појави видео снимка од изјавата на Месиќ од 1992 година во Новска, во која тој вели дека Јасеновац бил „работен логор“.
– Луѓето умираа, како што умираа и луѓето во војната, од тифус и дизентерија. Но тоа беа работни погони. Беше глупаво некого да го научиш да работи кожа, а потоа да го убиеш – изјавил Месиќ.
Сојузот на антифашисти во меѓувреме се огради од контроверзната изјава на Месиќ.