Албанскиот претседател Бујар Нишани потпиша указ со кој локалните избори во земјата ќе се одржат на 21-ви јуни наредната година, јави дописникот на МИА од Тирана.
Тоа го направи по соопштувањето на одлуката на Уставниот суд, со која законот за новата административно-територијална поделба беше прогласен за неспорен, со што истиот останува во сила.
Со тоа Нишани го запази крајниот рок, 15. декември, предвиден со изборниот законик, до кога требаше да ги закаже локалните избори.
Претходно, поради несогласувањето со новата територијална поделба, за што до Уставниот суд достави и две барања, за соборување и за прогласување на законот за неуставен (истите судот ги отфрли), опозициските демократи најавија бојкот на локалните избори.
Тие сметаат дека владејачките социјалистите намерно ја прекроиле државата за да ја зграпчат и локалната власт.