Комисијата за европски прашања при долниот дом на Германскиот парламент денеска треба да расправа за состојбите во Западниот Балкан, јавува програмата на македонски јазик на германскиот државен сервис „Дојче Веле“.
Како што пренесува дописникот на МИА од Берлин, на седницата на која што не може да присуствува јавноста, се очекува да бидат презентирани информации за земјите од Западниот Балкан.
Меѓу точките на дневниот ред треба да бидат состојбата во Македонија, Босна и Херцеговина, а се очекува да стане збор и за политичката криза во Албанија и ситуацијата на Косово.
Во Комисијата за европски прашања при Бундестагот членуваат 34 пратеници од сите парламентарни партии, од нив најголем дел 17 се пратеници на централно-десничарската сестринска група ЦДУ/ЦСУ, 11 од Социјалдемократите, и по тројца од „Левица“ и „Зелените“.
Минатата недела, членот на оваа Комисија од редовите на ЦДУ Торнстен Фрај за МИА изјави дека Европската унија мора да влева доверба кај идните членки дека тоа што е договорено ќе го исполни. Притоа, Фрај побара зејмјите во регионот да ги надминат сите отворени прашања за да можат да продолжат на патот кон ЕУ.
– Во најдобар интерес на ЕУ и на Германија е да ги поддржат земјите од Западниот Балкан и тие да станат членки. Треба да биде јасно дека ако критериумите од Копенхаген бидат исполнети, тогаш мора да следи членство во ЕУ. За мене ова е прашање кое што влијае на довербата и на кредибилитетот на ЕУ. За волја на вистината, во многу земји од Западен Балкан се уште имаат проблеми кои треба да се надминат. Во Македонија имаме уставна криза поради која се уште не може да се направи влада по изборите во декември. Ситуацијата е комплицирана, но треба да се извади најдоброто од изборните резултати и да се почитува волјата на македонскиот народ и македонските граѓани, изјави за МИА пратеникот на ЦДУ и член на Комисијата за европски прашања во Бундестагот.