Во Слатина, во Хрватска една жена беше убиена пред очите на своите деца, а нејзините познаници и членови на семејството тврдат дека пред трагедијата таа постојано предупредуваше на опасноста и бараше помош од институциите.
Според нив, жената со месеци зборуваше дека стравува за себе и за децата и предупредуваше дека може да се случи нешто сериозно.
„Таа бараше помош, велеше дека не е добро и дека ќе се случи нешто лошо. Еден член на семејството отиде со неа за да побараат таа да биде испратена на лекување, бидејќи сметаше дека постои проблем“, изјави за хрватските медиуми еден од нејзините познаници.
Тој исто така тврди дека и претходно имаше насилство во семејството.
„Ја претепа во јули, таа заврши во болница, по што започнаа постапка за развод“, рече тој.
Според него, жената побара помош непосредно пред убиството.
„Еден час пред убиството, таа се јави во полиција. Рече дека се плаши, дека останаа сами со него и побара да дојдат по него бидејќи е пијан и насилен. Не излегоа на терен“, тврди познаник на убиената жена.
Тој вели дека соседите подоцна повикаа помош откако слушнаа како децата врескаат, но веќе беше доцна.
Според неофицијални информации, трагедијата се случи за време на прославата на роденденот на едно од децата на убиената жена.
Нејзините роднини сега упатуваат критики и кон постапувањето на институциите за социјална заштита.