Аптеките и продавниците со прехранбени производи во Босна и Херцеговина, во близина на границата со Хрватска, имаат зголемен број хрватски клиенти по воведувањето на почетокот на годината на ДДВ во Хрватска врз лекарствата и некои прехранбени производи, пишува сараевскиот весник „Дневни аваз“.
Потрошувачите од Хрватска доаѓаат во БиХ во потрага по поевтини лекарства, прехранбени производи и пијалоци. Според податоците на граничната полиција на БиХ, во просек по 50 автомобили дневно ја минуваат границата меѓу Хрватска и БиХ кај Долјани.
Аптеките, исто така, бележат зголемен број потрошувачи од Хрватска, што го објаснуваат со пониските цени во БиХ по воведувањето во Хрватска на 1 јануари 2013 година ДДВ од пет проценти на лекарствата, лебот, млекото и книгите.
Хрватите пазарат во БиХ бидејќи ДДВ-то во земјата изнесува 17 проценти, а секоја набавка од над 100 конвертибилни марки, или 50 евра, ги исполнува условите за враќање на ДДВ.