Некогашната куќа на Јосип Броз Тито во Гајници, Хрватска, во која за време на Втората светска војна, престојувал со тогашната сопруга Херта Хас и синот Мишо, наскоро би требало да биде урната, а на тоа место ќе се гради нова зграда на Месниот одбор на Гајница.
-Гајнице е единствен месен одбор кој нема своја просторија и на овој начин би се решил проблемот. На ова подрачје живеат околу 9.000 жители – изјавил Дубравко Перош, претседателот на собранието на Подсусед-Врапче.
Тој додал дека градбата не е под никаква заштита и дека нема статус на спомен куќа, а за евентуално поставување на спомен обележје за Тито е подготвен да разговара.
Инаку синот на Јосип Броз, Мишо, во 1979 година се одрекол од куќата под услов на тоа место да се изгради меморијален музеј за неговиот татко и НОБ. Со оглед на тоа што проектот не е реализиран, тој во 2003 година поднел тужба против Загреб и барал враќање на имотот, меѓутоа судот го одбил неговото барање.
Е.Г.