Претставниците на владите на Грција и на Бугарија вчера во Атина потпишаа неколку договори во рамките на вториот состанок на Грчко-бугарскиот совет за соработка.
Претходно, бугарскиот премиер Бојко Борисов се сретна со грчкиот претседател и премиер, Каролос Папуљас и Антонис Самарас.
– Меѓу Бугарија и Грција постои стратешка соработка на многу полиња и двете страни постигнаа договори во областите, како што е борбата против криминалот и илегалната имиграција, управување со водите, телекомуникациите, земјоделството, истакна Самарас по средбата со Борисов.
Бугарскиот премиер посочи дека двете страни постигнале договор изградбата на интерконекција меѓу гасните мрежи на Бугарија и на Грција да почне во март, што ќе овозможи намалување на зависноста од увоз на гас и трговија со природен гас со трети земји.
Меѓу договорите е потпишан и за развој на систем за рано предупредување од поплави долж реката Марица, договор за соработка во областа на информатичката технологија и комуникации, како и договор за туризмот.
Грција вети дека до март 2013 година ќе го отвори долго одложуваниот граничен премин со Бугарија.