Под мотото „Покажи гордост, тестирај ја совеста“, речиси стотина ЛГБТ активисти прошетаа по центарот на Белград по повод 27 Јули, Меѓународниот ден на гордоста. Собирот го обезбедуваа околу 30-тина полицајци, за да не дојде до некој посериозен инцидент.
Според Бобан Стојановиќ, извршен директор на „Квир центарот“ целта на ваквиот собир е да се пружи поддршка на реформите во образованието, а воедно и да побараат оставка на министерот за образование Жарко Обрадовиќ.
Тој вели дека анализата на учебниците се уште покажува висок степен на хомофобични содржини, со кои хомосексуалноста се уште се поистоветува со болест, педофилија и зоофилија.
– Денот на гордоста се одбележува во знак на сеќавање на бунтот на ЛГБТ заедницата против системот кој репресивно се однесуваше кон припадниците на оваа заедница. Со оваа акција сакаме да го задржиме критиќкиот однос кон институциите во општеството – изјави Стојановиќ.
Тој додаде дека иако ЛГБТ заедницата се изборила за одредени права, сепак образованието е еден од клучните фактори за создавање на отворено општество.
Петар Клинчарски