Европската унија ќе стави на располагање најмалку 400 милиони евра за Словенија по разорните поплави, во кои загинаа шест лица и погодија десетици илјади домаќинства, изјави претседателката на Европската комисија, Урсула фон дер Лајен.
Илјадници луѓе се евакуирани од своите домови во северозападна и централна Словенија, додека армијата, пожарникарите и спасувачите се обидуваат да ги расчистат улиците.
– Имаме добар пакет на итна, среднорочна и долгорочна поддршка за Словенија – рече Фон дер Лајен за време на посетата на поплавеното подрачје.
Таа додаде дека Словенија може да побара помош од ЕУ, која и става на располагање 2,7 милијарди евра и додаде дека 3,3 милијарди евра од другите фондови на Унијата кои веќе и се доделени на Словенија може да се пренаменат за итна помош по поплавите.
„Десетици илјади куќи се поплавени, а десетици илјади луѓе размислуваат како да ги преживеат следните недели и месеци“, изјави словенечкиот премиер Роберт Голоб.
„Нашата порака до нив е јасна – помошта ќе биде брза, ефективна и никој нема да биде заборавен“, додаде тој.