Високиот претставник на ЕУ за надворешна политика и безбедност Јозеп Борељ на својот Твитер профил објави дека Белград и Приштина постигнале договор.
– Како дел од дијалогот со поддршка на ЕУ, Србија се согласи да ги укине документите за влез/излез за оние кои имаат косовски лични документи, а Косово се согласи да не ги воведува за оние кои имаат српски лични карти. Косовските Срби, како и сите други граѓани, ќе можат слободно да патуваат меѓу Косово и Србија користејќи ги нивните лични карти. ЕУ штотуку доби гаранции од премиерот Курти за таа цел – рече претставникот на ЕУ.
– Ова е европско решение. Им честитаме на двајцата лидери за оваа одлука и на нивното лидерство – додаде Борељ.
Специјалниот пратеник на ЕУ за дијалогот меѓу Белград и Приштина, Мирослав Лајчак, им се заблагодари на специјалниот пратеник на САД за Западен Балкан, Габриел Ескобар и на американската дипломатија за нивниот силен ангажман во поддршката на овој дијалог, кој се води под покровителство на ЕУ. . На Твитер Лајчак ја сподели објавата на шефот на дипломатијата на ЕУ, Јосеп Борељ, кој напиша дека Белград и Приштина постигнале договор за лични карти.
Да потсетиме, претседателот на Србија, Александар Вучиќ, претходно денеска, говорејќи за разговорите што се водеа претходните денови за Косово и Метохија, изјави дека нема договор за регистарските таблички, но дека се надева оти ЕУ ќе обезбедуваат гаранции за лични документи.