Црна Гора треба да покаже дополнителни резултати во борбата против организираниот криминал и корупцијата, се наведува во годишниот извештај на ЕК за напредокот на државата на патот за членство во ЕУ.
Земјата, според ЕК, постигнала напредок во воспоставувањето на пазарната економија, ги подобрила можностите за исполнување на ветувањата дадени пред ЕУ и има голем степен на задоволувачки политички показатели за членство во Унијата.
Во текот на последната година беа отворени преговори за две поглавја кои завршија успешно во првичната фаза. ЕК очекува да види реализација на планот од овие преговори за судскиот систем, за основните човекови права и слободи и за безбедноста.
Во изминатата година Црна Гора беше соочена со сериозни предизвици, поврзани со злоупотреби на јавни средства во корист на партиски интереси и недоверба во изборниот процес, се вели во извештајот.
– Нападите врз новинари предизвикуваат загриженост и за нив е потребна истрага и покренување обвиненија, наведува ЕК.