Во Брисел денеска ќе се одржи голема донаторска конференција за справување со последиците од катастрофалните поплави во Србија и Босна и Херцеговина.
На конференцијата ќе учествуваат голем број официјални лица и меѓународни организации од Европа и светот.
Делегацијата на Србија ќе ја предводи претседателот Томислав Николиќ, а делегацијата на БиХ претседателот на претседателството Бакир Изетбеговиќ.
Домаќин на конференцијата, организирана под мотото „Да изградиме повторно заедно“ е Европската комисија, а коорганизатори се Франција и Словенија.
Собирот ќе го отворaт еврокомесарот за проширување Штефан Филе, премиерката на Словенија Аленка Братушек и шефот на француската дипломатија Лоран Фабиус.
На конференцијата ќе бидат прикажани и три филма за катастрофалните поплави во БиХ и во Србија, како и реакциите на меѓународната заедница, а завршниот говор ќе го одржи еврокомесарот за хуманитарна помош Кристалина Георгиева.