Република Српска не се откажува од референдумот, изјави денеска претседателот на РС, Милорад Додик по состанокот со амбасадори и шефот на Канцеларијата на Амбасадата на САД во Бањалука.
Додик разговаше со амбасадорите на Франција, Италија, Британија и заменикот шеф на делегацијата на ЕУ во БиХ.
Амбасадорите изнеле барање за одлагање на референдумот, на што добиле јасен одговор од Додик дека нема одложување и оти референдумот ќе се одржи, јавуваат српски медиуми.
– РС не се откажува од референдумот за Денот на Република Српска што ќе биде одржан на 25 септември, нагласи Додик и ги повика граѓаните да излезат на гласање.
Со речиси ист состав на амбасадори, неодамна средба имаше и членот на Претседателството на БиХ од редовите на бошњаците, Бакир Изетбеговиќ. По состанокот, тој изјави дека од амбасадорите добил уверување дека референдумот во РС „никогаш и никого нема да подели во БиХ“.