Грчкиот премиер Алексис Ципрас денеска во Рим ќе се сретне со неговиот италијански колега Матео Ренци.
Официјална Атина е задоволна од вчерашниот коментар на Ренци за радио РТЛ дека сака дискусијата за економската политика „да ја сврти од штедење кон раст и инвестиции“. Грчката Влада смета дека овој коментар е позитивна појдовна точка за „продуктивна дискусија“ меѓу двајцата премиери, јавува дописникот на МИА од Атина.
Грчката државна новинска агенција јави дека на средбата Ципрас се очекува да напомене дека Грција „е подготвена да продолжи со реформите во насока на фискална рамнотежа и социјална правда“, објаснувајќи дека за тоа е потребно време и фискален простор.
Грчкиот премиер исто така ќе му каже на Ренци дека „до вртење кон раст и инвестиции не може да се дојде преку тројката која ги блокира“ и оти Европа „најпосле мора да има доверба во своите институции и тела“.